Í høvuðsevninum Kappingar eru spennandi og fakliga viðkomandi kappingar, sum geva næmingum møguleika at luttaka í menning, nýskapan og samfelagsgreining:

Pangea – støddfrøðikapping
Ein landsumfatandi støddfrøðikapping fyri næmingar í 3. til 9. flokki. Kappingin varpar ljós á støddfrøði sum eina skapandi og spennandi lærugrein, og næmingar arbeiða við uppgávum, ið krevja bæði talfimi og hugsavnan. Kappingin er skipað í trimum stigum: innleiðandi, semifinalu og finalu.

First Lego League
Ein altjóða kapping fyri børn og ung í aldrinum 10 til 16 ár. Liðini byggja og forrita LEGO-robotar og loysa uppgávur, ið hava við veruligar samfelagsavbjóðingar at gera. Her arbeiða næmingar við tøkni, forritan og nýskapan – og læra at samstarva og leggja fram úrslit.

Filmskapping – Heimsmálini á filmi
Næmingar í hádeild og miðnámi gera stuttfilmar, sum lýsa minst tvey av Heimsmálunum hjá ST. Filmarnir kunnu vera upp til sjey minuttir langir og hava ein greiðan boðskap. Skapanarevni, samfelagsfatan og miðlaførleikar verða styrktir í einum arbeiði, har bæði kritisk hugsan og frásøgulist eru í miðdeplinum.

Vitanarfróðu-kappingin
Næmingar í 4. - 6. flokki kunnu luttaka í hesari kappingini. Tey kunnu granska tað, tey hava hug til og í øllum fakum, eisini við at arbeiða tvørfakligt.

Ársins Vitanarfróðu er ein kapping, men tit kunnu sjálvandi og vónandi eisini, arbeiða líka sum tey Vitanarfróðu árið runt, tí hesin kanningarhátturin er bæði góður, stuttligur og forvitnisligur at brúka í øllum lærugreinum í fólkaskúlanum.

Gjøgnum hesar kappingar fáa næmingar dygdargóða læru, fakligt íkast og kensluna av at arbeiða við veruligum, meiningsfullum uppgávum saman við øðrum.